Bitrix24 корпоративтік порталының нұсқаларын салыстыру: Бұлт па, әлде қорап па?

Bitrix24 — кез келген көлемдегі ұйымдарда бизнесті және ішкі ынтымақтастықты ұйымдастыруға арналған шешім. Жүйе дәстүрлі корпоративтік желіге тән құралдарды әлеуметтік ынтымақтастық элементтерімен біріктіріп, оңтайлы виртуалды жұмыс алаңын қалыптастырады. Bitrix24 жүйесін онлайн-қызмет ретінде пайдалануға немесе өз серверіңізге орнатылатын «қораптық» модификация ретінде іске қосуға болады. Сіздің бизнесіңіздің сипатына, компанияңыздың көлеміне және ішкі жүйеге қойылатын талаптарға байланысты бұлттық нұсқаның икемді ай сайынғы төлемін таңдау немесе өз серверіңізге орналастыру үшін мерзімсіз лицензияны сатып алып, иеленуді таңдауға болады.

«Бұлт» пен «Қорап» — екеуінің де функционалдық мүмкіндіктері мен қызмет көрсетуге байланысты артықшылығы мен кемшіліктері бар; қайсысы сіздің жұмысыңызға сәйкес келетіні бірнеше факторға тәуелді. Осы мақалада біз өнімнің барлық функцияларын терең талқыламаймыз, бүгінгі мақалада екі нұсқаның бір-қанша артықшылықтарын техникалық және экономикалық аспектілерін ескере отырып қарастырамыз.

«Бұлт» нұсқасы — артықшылықтары мен кемшіліктері

Bitrix24-тің бұлттық модификациясы — стандартты бизнес-процестерге (мысалы, интернет-дүкен немесе офлайн-дүкен сияқты) ие жас компаниялар үшін ұтымды шешім. Таңдалған коммерциялық жазылымдар Intranet (қызметкерлер мен басшылық) және Extranet (серіктестер мен клиенттер) пайдаланушыларына шексіз есептік жазбалар ұсынады. Егер болашақта өнімді тереңірек баптау немесе басқа корпоративтік бағдарламалық қамтамасыз етуімен интеграция қажет болса, Bitrix24 Cloud тіркелгіңізді кез келген уақытта Box (қораптық) нұсқаға көшіруге болады.

«Бұлт» — тарифтік жоспарлар:

Тегін: бастаушыларға арналған тегін тарифтік жоспар, функционалы шектеулі, бірақ пайдаланушылар саны шектеусіз. Айына баға: тегін

Стандарт: қызметкерлер саны 50 адамға дейінгі компанияларға арналған. Компанияның негізгі процестерін автоматтандыру. Айына баға: бастап 34 000 тг./ай

Негізгі: шағын компаниялар мен сату бөлімдері (5 пайдаланушыға дейін) үшін қолайлы, сыртқы байланыс арналары мен телефонияны қосуға мүмкіндік береді. Айына баға: бастап 12 000 тг./ай

Кәсіби: толық функционалға қолжетімділік — бизнес-процестерді баптау, кеңейтілген есеп беру, қызметкерлердің жұмыс уақытын бақылау және 1С жүйесімен интеграция. Пайдаланушылар саны 100 адамға дейін. Айына баға: бастап 68 000 тг./ай

Энтерпрайз: көптеген бөлімшелері мен кеңселері бар ірі компанияларға арналған. Барлық функционал қолжетімді, сондай-ақ бір CRM жүйесінде бірнеше филиал құрып, оларды бөлек басқару мүмкіндігі бар. Бұл тарифте 250-ден 10 000-ға дейін пайдаланушы тіркей аласыз. Айына баға: бастап 170 000 тг./ай

Орнату және баптау

Платформа тіркеледі, қызметкерлерге қосылуға шақырулар жіберіледі. Барлық баптаулар тікелей пайдаланушы интерфейсінде орындалады, ал көмек және оқыту жүйесі жүйенің бастапқы баптауларын орындауға көмектеседі. Белгілі бір тарифтік жоспарға сәйкес логотип пен домендік атауды өзгертуге болады, бірақ стандартты интерфейстерді өзгерту немесе жеке беттер жасау мүмкіндігі қарастырылмаған. Негізінде, барлық баптаулар MarketPlace қосымшаларының мүмкіндіктерімен шектеледі. «Бұлттық» нұсқа стандартты функционалмен шектелгенімен, қосымша техникалық қызметтер мен ірі қаржылық салымдарсыз қарапайым іске қосылады.

Әкімшілендіру және техникалық қызмет көрсету

Өнім жеткізушісі бағдарламалық жасақтаманы жаңарту және қызмет көрсету үшін жауап береді. Деректердің резервтік көшірмесі тарифтік жоспарларға сәйкес автоматты түрде жасалады. Резервтік көшірме сұраныс бойынша қалпына келтіріледі. Жаңартуларды бақылап, оларды өз бетіңізше орнатудың қажеті жоқ, әкімшілендіру функциясы қарастырылмаған.

Қауіпсіздік және деректерді сақтау

«Бұлттық» нұсқада ақпарат Bitrix24 сервер станцияларында шифрланған түрде сақталады, сервермен байланыс та шифрланған. Сақтау көлемі қолданылатын тарифтік жоспарға байланысты анықталады. Егер сіз Bitrix24 қызметінен бас тартуға шешім қабылдасаңыз, экспорттауға қолжетімді жалғыз деректер — бұл Лидтер, контакттар, мәмілелер және компаниялар туралы ақпарат; қалған деректер Bitrix24 тарапында қалады.

Интеграция

Бұлттық нұсқа IMAP арқылы поштамен, SIP-коннектор арқылы телефониямен және REST API арқылы басқа жүйелермен интеграциялануы мүмкін. REST API технологиясы Bitrix24 жүйесін сыртқы жүйелермен интеграциялауға мүмкіндік береді, тіпті каталогта сәйкес қосымша болмаса да. Кейбір интеграция түрлері тек белгілі бір тарифтік жоспар пайдаланушыларына ғана қолжетімді болуы мүмкін.

«Бұлт» келесі жағдайларда қолайлы:

егер сіздің ұйымыңыз шағын болса және штатта IT-маман жоқ болса;

стандартталған жұмыс процестері терең баптауды қажет етпесе;

егер сіз корпоративтік порталмен алғаш рет жұмыс істеп көріп, бұл форматтың сізге қолайлы екенін анықтағыңыз келсе.

«Қораптық» нұсқа — артықшылықтары мен кемшіліктері

«Бұлттық» модификациядан айырмашылығы, «Қораптық» нұсқа сіздің қашықтағы серверіңізде орналастырылады немесе жергілікті желіде орнатылады және толығымен өз бетіңізше бапталады: өнім интерфейсінде логотипті, түстік схеманы, макетті, мәзір құрылымын, бет мазмұнын өзгертуге, гаджеттерді қосу немесе жоюға, CRM өрістерін өзгертуге болады. Bitrix24-тің дәл осы жергілікті нұсқасын қолдануға себеп болатын жағдайлар:

заңнама деректерді белгілі бір жерде сақтауды талап етеді;

бастапқы кодқа қолжетімділік қажет;

«Бұлтта» жоқ құралдар мен параметрлер қажет болған жағдайда.

«Қорап» — тарифтік жоспарлар

Интернет-дүкен + CRM: сату бөлімінің бизнес-процестерін баптауға арналған CRM модулі бар, функционал 12 пайдаланушыға есептелген. Бағасы: бастап 475 000 тг.

Энтерпрайз: бірнеше бөлімшелері мен департаменттері бар ірі компанияларға арналған функционал. Қызметкерлер саны — 1000-нан бастап. Бағасы: бастап 4 795 000 тг.

Корпоративтік портал: жүйенің кеңейтілген мүмкіндіктері, барлық баптау модульдері бар, функционал 50-ден 500 пайдаланушыға дейін есептелген. Бағасы: бастап 667 000 тг.

Орнату және баптау

Алдымен жеке сервер немесе сәйкес хостинг бапталады, Bitrix24 жүйесі сатып алынып, орнатылады, қызметкерлерге қосылуға шақырулар жіберіледі. Бұл процесс бағдарламалық қамтамасыз етуді орнатып, оны басқаруға қабілетті IT маманының қатысуын талап етеді. «Қораптық» нұсқада порталдың логикасын нақты қажеттіліктерге сай баптауға болады. Ашық бастапқы код әртүрлі өзгерістер енгізуге мүмкіндік береді: баптаулар мен интеграциялар PHP арқылы немесе API модульдері арқылы жүзеге асырылады.

Әкімшілендіру және техникалық қызмет көрсету

«Қораптық» нұсқадағы бағдарламалық жасақтаманы жаңарту мен техникалық қолдау жауапкершілігі клиентке жүктеледі. Жаңартулардың уақытын және резервтік көшіру жиілігін өз бетіңізше баптауға болады, алайда бұл үшін компанияда IT маманының болуы қажет.

Қауіпсіздік және деректерді сақтау

Барлық ақпарат клиенттің жеке серверінде сақталады, сондықтан сақтау көлемін және деректердің қорғалу деңгейін клиенттің өзі анықтайды. Осылайша өнімді жабық инфрақұрылымда пайдалану мүмкіндігі болады, сонымен қатар алдын ала SSL сертификатын орнатуға болады.

Интеграция

Bitrix24 «Қораптық» нұсқасы PHP негізінде жасалған және AD/LDAP хаттамаларымен интеграцияны қолдайды. Өзара үйлесімді болған жағдайда үшінші тарап гаджеттері, кеңейтімдер мен модульдерді біріктіруге болады. Ашық бастапқы код жүйені баптау мен интеграция мүмкіндіктерін арттырады. Автономды нұсқа ActiveDirectory, SSO, NTLM жүйелерімен интеграцияланады, бұл тек Business және Enterprise тарифтік жоспарларында қолжетімді.

Қораптық нұсқаны сатып алудың тиімділігін егжей-тегжейлі қарастырайық. «Корпоративтік портал» лицензиясының бағасы — 667 000 теңге (бір реттік төлем), ал «Кәсіби» бұлттық тарифінің бағасы — жылына 652 800 теңге. Bitrix24 қораптық жүйесінің дұрыс жұмысын және жаңартуларды алу үшін жазылымды ұзарту қажет, бұл лицензия құнының 25%-ын құрайды, яғни жылына 166 750 теңге. Енді жүйеге кететін жалпы шығындарды есептейік:

Осылайша, екінші жылдан бастап қораптық нұсқаны пайдалану үнемдірек болады, өйткені бұлттық нұсқада тарифтер үнемі өзгеріп тұрады.

«Қораптық нұсқа» келесілерге сәйкес келеді:

сіз үлкен компанияны басқарасыз және интерфейсті, сыртқы интеграцияларды, жеке модульдерді баптау бойынша нақты көзқарасыңыз бар;

сіздің командаңызда техникалық мәселелерді шеше алатын қызметкер бар немесе білікті маманды шақыру мүмкіндігіңіз бар;

сізге деректерді қорғау процесін толық бақылау қажет;

компанияңыз жұмыс процестерін және бизнесті автоматтандырудың стандартты емес схемасын қолданады.